Qaynarca palçıq vulkanı Şabrandan 8-10 km cənub-qərbdə, Miosen dövrünün pont çöküntülərində yerləşir. Qaynarca vulkanı hündürlüyü 2-3 m-dən çox olmayan, bünövrəsinin isə diametri 1,5-2 m olan 218 qrif və salsadan ibarətdir. Radiometrik ölçmələr müvafiq olaraq 0-3000 μR/saat və 0-10000 μR/saat diapazonunda qamma-şüalanmanın ekspozisiya dozasının gücünü ölçən SRP-88M və InSpector-1000 radiometrləri ilə aparılmışdır. Müəyyən olunmuşdur ki, Qaynarca palçıq vulkanının ərazisində süxurların və brekçiyada qamma-şüalanmanın ekspozisiya dozasının gücü geniş hüdudlarda dəyişir - 9,5-23 μR/saat. Həmçinin, Qaynarca palçıq vulkanında sopka brekçiyasının xüsusi aktivliyi geniş şəkildə - 106,4-515,12 Bq/kq arasında dəyişməsi təyin edilmişdir. Bu göstəricilər inteqral qamma radiasiyasının ümumi səviyyəsini əks etdirir və süxurlarda mövcud olan radionuklidlərin tərkib və miqdarından asılıdır. Bundan əlavə tədqiqat zamanı iki brekçiya nümunəsi Ra-226, Ra-228 və Rn-222 radionuklidlərinin tərkibinə görə təhlil edilmişdir. Təhlil olunan nümunələrdə Ra-226-nın miqdarı 90 və 92 Bq/kq (norma 370 Bk/kq) olaraq müəyyən edilmişdir, Ra-228 və Rn-222 radionuklidləri isə aşkar edilməmişdir.