Məqalədə tədqiqat sahəsi, onun geoloji-geofiziki öyrənilməsi barəsində qısa məlumatlar verildikdən sonra aparılan işlərin metodikasından, alınmış nəticələrdən bəhs olunur. İşlərin sahədə yerinə yetirilmə şəraitinin müxtəlifliyi, quruda, dənizdə, kiçik göl və gölməçələrdə işlər aparıldığından, tətbiq edilən dalğa mənbələri və seysmoqəbuledicilər də müxtəlif olmuşlar: partlayış, akustik, vibro mənbələrdən və geofonlar, hidrofonlar, marşfonlardan istifadə edilmişdir. Bu da öz növbəsində seysmik yazılardan vahid 3D kubunun alınması məsələsini vacib və aktual etmişdir. Modelləşdirmədən istifadə etməklə bu məsələ həll edilmişdir.

Tədqiqat sahəsində yaxşı kollektorluq xassələri ilə seçilən anomal kəsiliş hissələrinin və onların planda yerlərinin müəyyən edilməsi məqsədilə “ekspres AVO-analiz” aparılmışdır. AVO-analizin hesablamaları Şue tənliyinin ikihədli variantında aparılmışdır, yəni uzununa dalğanın (P-dalğasının) normal düşmə halı üçün əksetdiricilik qabiliyyəti (A əmsalı) və həmin P-dalğasının ayırıcı sərhədə aralıq düşmə bucaqlarında (0-30⁰ bucaqlarda) əksetdirilmə qabiliyyətini səciyyələndirən qradiyent (B əmsalı) hesablanmışdır.

Aparılmış AVO-analiz nəticəsində gömülmüş Hasilat-2 paleoqalxımının yamacında Miosenin yuxarılarında kollektor xassələrinin yaxşılaşdığı zona ayrılmış və xəritələndirilmişdir. Dinamik (amplitud) kəsilişlərdə bu zona zəif amplitudlu seysmik yazı fonunda öz intensivliyi ilə seçilir. Bu anomaliyanın konturları SH – V seysmik horizontu üzrə minimal amplitudlar xəritəsi üzərində göstərilmişdir.